ਪੀਏਯੂ ਦੇ ਵਾਈਸ ਚਾਂਸਲਰ ਨੇ ਖੇਤੀ ਚੁਣੌਤੀਆਂ ਦੇ ਹੱਲ ਲਈ ਅਮਰੀਕੀ ਵਫਦ ਨਾਲ ਵਿਚਾਰਾਂ ਕੀਤੀਆਂ

ਡਾ ਗੋਸਲ ਨੇ ਦੱਸਿਆ ਕਿ ਪੀਏਯੂ ਨੇ ਖੇਤ ਮਸ਼ੀਨਰੀ, ਮੁੜ ਉਤਪਾਦਨ ਖੇਤੀਬਾੜੀ, ਅਤੇ ਤਕਨਾਲੋਜੀ ਰੂਪਾਂਤਰਨ ਦੇ ਖੇਤਰ ਵਿੱਚ ਵਿਲੱਖਣ ਕਾਰਜ ਕੀਤਾ ਹੈ ਉਹਨਾਂ ਦੱਸਿਆ ਕਿ ਯੂਨੀਵਰਸਿਟੀ ਨੂੰ ਐਨ ਆਈ ਆਰ ਐਫ ਵੱਲੋਂ ਲਗਾਤਾਰ ਦੋ ਸਾਲਾਂ ਤੋਂ ਦੇਸ਼ ਦੀ ਸਰਵੋਤਮ ਖੇਤੀ ਯੂਨੀਵਰਸਿਟੀ ਐਲਾਨਿਆ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ ਡਾ ਗੋਸਲ ਨੇ ਹਰੀ ਕ੍ਰਾਂਤੀ ਲਿਆਉਣ ਵਿੱਚ ਪੀਏਯੂ ਦੀ ਭੂਮਿਕਾ ਨੂੰ ਉਜਾਗਰ ਕੀਤਾ। ਉਨਾਂ ਕਿਹਾ ਕਿ ਮੌਜੂਦਾ ਸਮੇਂ ਯੂਨੀਵਰਸਿਟੀ ਦਾ ਪੂਰਾ ਧਿਆਨ ਉਤਪਾਦਨ ਤਕਨੀਕਾਂ ਦੇ ਵਿਕਾਸ ਦੇ ਨਾਲ ਨਾਲ ਵਾਤਾਵਰਣ ਦੀ ਸੰਭਾਲ ਵਾਲੀਆਂ ਤਕਨੀਕਾਂ ਦਾ ਪਸਾਰ ਅਤੇ ਪੋਸ਼ਣ ਸਬੰਧੀ ਆਉਣ ਵਾਲੀਆਂ ਸਮੱਸਿਆਵਾਂ ਦੇ ਨਿਵਾਰਨ ਵੱਲ ਹੈ। ਉਨਾਂ ਕਿਹਾ ਕਿ ਪੀਏਯੂ ਸੰਸਾਰ ਦੀਆਂ ਉੱਚ ਪੱਧਰੀ ਸੰਸਥਾਵਾਂ ਨਾਲ ਸਾਂਝ ਦੇ ਮੌਕਿਆਂ ਨੂੰ ਵਧਾ ਕੇ ਖੇਤੀ ਵਿਗਿਆਨ ਦੇ ਅਨੁਭਵ ਨੂੰ ਵਿਸ਼ਵੀ ਬਣਾਉਣਾ ਚਾਹੁੰਦੀ ਹੈ। ਇਸ ਤੋਂ ਇਲਾਵਾ ਪੀਏਯੂ ਵਾਤਾਵਰਣ ਪੱਖੀ ਫਸਲੀ ਚੱਕਰ ਦੀ ਉਸਾਰੀ ਲਈ ਸੂਖਮ ਖੇਤੀ, ਮਸਨੂਈ ਬੁੱਧੀ ਅਤੇ ਸਥਿਰ ਮਸ਼ੀਨੀਕਰਨ ਨੂੰ ਧਿਆਨ ਵਿੱਚ ਰੱਖ ਕੇ ਆਪਣੇ ਕਾਰਜਾਂ ਨੂੰ ਅੰਜਾਮ ਦੇ ਰਹੀ ਹੈ ।